Qırımtatar tilinde yayın yapqan telekanal Moskva aman-aman bütün mustaqil qırımtatar matbuat vastalarını qapatqan Rusiye işğal etken Qırımdan uydu vastasınen yayınlamağa başladı.
Qırımnıñ şimdiki ükümet reisiniñ muavini bildirdi ki, «Millet» telekanalı «Rusiyege qarşı teşviqat ile» küreşecek.
Avgust ayında telekanal qayd etilgen soñ qırımtatarlar oña «Kremlniñ teşviqat matbuat vastası» dep, narazılıq bildirgen ediler. 2015 senesi sentâbr ayında telekanal yayın yapmağa başladı.
Telekanalnıñ baş müdiri Seyran Mambetov aprel 1-de bildirgenine köre, yayınları Rusiyeniñ «Yamal 401» uydusı vastasınen Rusiye, Ukraina, Orta Asiya ve Türkiyede kösterilecek.
Ukraina televideniye ve radio milliy şurasınıñ azası Sergey Kostinskiy «Milletniñ» uydu vastasınen yayınğa başlağanını Qırım.Aqiqatqa izaatlap, Milliy Şura Ukrkosmosqa Ukrainada mezkür uydunıñ yayınlavınen bağlı muracaatta bulunğanını ayttı.
Mart 30-da Ukraina haber siyaseti naziriniñ Qırım işlerinden vekâletlisi Emine Ceppar Qırım.Aqiqatqa bildirdi ki, Ukraina teleradioyayın meseleleri milliy şurası «Millet» telekanalı yayınlarınıñ Ukrainada qanunğa riayet etkenini teşkerecek.
Tam bir yıl evelsi, 2015 senesi aprel 1-de, Rusiyege qoltutqan Qırım akimiyeti ATR qırımtatar telekanalını ve ATR mediaholdingine kirgen diger kütleviy haber vastalarını qapattı. AQŞ, Avropa birligi, OSCE, Amnesty International bu adımnı takbih etip, yarımadada qırımtatarlarğa basqı yapılğanını qayd ettiler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
