Link açıqlığı

Eki aftadan soñ Rusiyede qırımtatarlarnıñ lideri Mustafa Cemilevniñ Rusiye işğal etken Qırımğa kirişi yasaq etilmesinen bağlı davanıñ mahkemesi keçirilecek, dep bildirdi adliyecisi Mark Feygin.

«Aprel 14-te Cemilevniñ Qırımğa kiriş yasağından şikâyeti boyunca davalaşacam», – dep yazdı adliyeci Twitterde.

Cemilevniñ FSBge qarşı davanıñ mahkemeden aldın subeti mart 31-ne belgilengen edi.

Fevral ayında Ukraina prezidentiniñ qırımtatar halqı işlerinden vekâletlisiniñ matbuat hızmeti adliyeci Mark Feygin tarafından qırımtatarlarnıñ milliy lideri Mustafa Cemilevge Qırımğa kirişi qanunsız şekilde yasaq etilgeninden Rusiye Federal havfsızlıq hızmetine qarşı dava açtırğanını haber etken edi.

Aynı yasaq Qırımtatar Milliy Meclisiniñ reisi Refat Çubarovğa da berildi. Bu işlerni İnsan aqları Avropa mahkemesi de baqa.

Bundan evel Cemilev Qırımğa kirişi yasaq etilgeninden sebep Rusiye Federal migratsion hızmetine qarşı dava açtırğan edi.

2014 senesi aprel 22-de Mustafa Cemilevge 5 yıl devamında Qırımğa kelmege yasaq ettiler.

Rusiyeniñ Qırım işğalinden soñ Mustafa Cemilev Ukraina prezidentiniñ qırımtatar halqı işlerinden vekâletlisi vazifesine tayin etildi.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG