Rusiye kontrol etken Qırım sağlıq saqlav nazirliginiñ yolbaşçı muavini Aleksey Slobodânik bildirgenine köre, Qırımnıñ tibbiy müessiselerinde keçirilgen tamir işleri 2016 senesi iyül 1-ne qadar bitecek.
Bunı Slobodânik cumaaqşamı künü mart 31-de kollegiya toplaşuvında ayttı, dep bildire Qırım nazirliginiñ matbuat hızmeti.
Onıñ aytqanına köre, ilk sefer Qırımda birden 16 tibbiy müessiseni tamir etmek içün para berildi. Tibbiy müessiselernin çoqusı tamir etildi, dep ayttı Slobodânik.
«25 yıldan berli Qırım tibbiy müessiselerinde bu qadar tamir işi yapılmağan edi. Anda-mında tamir ete ediler, amma birden tamir etilmegen edi», – dep qayd etti Aleksey Slobodânik.
Onıñ bildirgenine köre, 56 tedavi müessisesi içün 4,3 biñ dane tibbiy donatma satın alındı, onıñ 65% endi qullanıla.
Mart 31-de olıp keçken kollegiya toplaşuvında Qırım sağlıq saqlav naziri Aleksandr Golenko 2015 senesi sağlıq saqlav müessiseleriniñ faaliyetine yekün çekti. Onıñ qayd etkenine köre, yarımadada ölüv arta, 2016 senesiniñ esas vazifesi – ilk tibbiy-sanitar yardımnı teminlemek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
