Kremlge boysunğan Qırım ükümetiniñ reisi Sergey Aksenov yarımadada medeniy tedbirler çoqça olmaq kerek, dep ayta. Bunı Aksenov mart 31-de Facebookta Qırım medeniyet naziri Arina Novoselskaya ile körüşüvini izaatlap bildirdi.
«Mence, Qırım rejisser ve çeşit kinofestivaller içün bir meydançıq olmaq kerek. Adet üzre sanat adamları bizge kele ediler. Medeniy tedbirler çoqça keçirilmek kerek, Rusiye Federatsiyası meşur medeniyet erbapları reberlik yapacaqlar», – dedi Aksenov.
Onıñ aytqanına köre, Qırımda «Qırım – barışıq toprağı» qısqa kinolarnıñ kinofestivali, «Avrasiya köprü» Yalta kinofestivali, «Qırım kino ustaları» gençler arasında qısqa kino festivali, Dmitriy Haratyannıñ yolbaşçılığında «Küneşli ada» bala kinosınıñ festivaliniñ keçirilmesi planlaştırıla.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
