Ukraina prezidenti Petro Poroşenko Washingtonda «Ukrainanıñ azatlıq oğrunda küreşi devam ete» forumında çıqışta bulunıp, Rusiye istilâsına qarşılıq kösterilmesinde AQŞ qoltutuvı ve liderligi ğayet müim olğanını qayd etti. Bunı Ukraina devlet yolbaşçısınıñ resmiy saytı bildire.
«Bu zor zamanlarda Amerikanı küçlü olıp özüne işanmağa çağıram – bütün dünya Amerikağa işanmağa devam etkeni kibi. Pragmatizm eñ müim şey azatlıq olğan qıymetlerni unuttırmasın. Amerikağa alçaq olmağa imkân bermeñiz», – dep ayttı Poroşenko çıqışında.
Prezident qayd etti ki, Ukraina ve AQŞ arasında dialog qaviyleştirilmek kerek, şu cümleden memleketler arasındaki strategik işbirligi, eki taraflı havfsızlıq añlaşmaları tizilecek.
Poroşenko aynı bu çıqışında qayd etti ki, Ukraina eki yıl içinde ordusını tikledi ve «qabarcılıq ile küreş sistemasını tolusınen» tamir etti.
Ukraina prezidenti Petro Poroşenko mart 30-da Amerika Qoşma Ştatlarına iş ziyaretinen keldi. Ukraina prezidenti Washingtondaki nükleer havfsızlığı sammitinde ve «Ukrainanıñ azatlıq oğrunda küreşi» forumında iştirak etecek.
Mart 31-de ve aprel 1-de Washingtonda keçirilecek nükleer havfsızlığı sammitinde 50 devletniñ yolbaşçısı iştirak etecektir. Forumnıñ esas mevzusı – bölüne bilir malzemelerni ekstremistlerden nasıl etip uzaqlaştırmaq mümkün. Rusiye tedbirde iştirak etmek, Washington Moskvanıñ bu adımına «imkânnı qaçıruv» dedi.
