Qırımtatar Milliy Qurultayı Merkeziy saylav komissiyasınıñ reisi Zair Smedlâyev Qırımda apiste yatqan Meclis reisiniñ muavini Ahtem Çiygoznıñ mart 29-da mahkemede yapqan çıqışını aydınlattı.
Smedlâyevniñ aytqanına köre, Çiygoz Rusiye işğal etken yarımadada bütün qırımtatar halqına qarşı küreşkenini bildirdi.
«Bugünde-bugün Rusiye Federatsiyası apiske alınğan qırımtatarlarnen degil, bütün qırımtatar halqına qarşı küreşe», – dep tekrarladı Çiygoznıñ aytqanlarını Smedlâyev.
Onıñ bildirgenine köre, Meclis reisiniñ muavini emin ki, qırımtatarlarğa qarşı büyük provokatsiyalar olacaq.
«Ahtem Çiygoz basqı artqanına baqmadan, printsiplerinden vazgeçmegenini ve canını feda etmege kerek olsa da, soñuna qadar dayanmaq niyetlengenini yetkizmege rica etti», – dep qayd etti Smedlâyev.
Rusiye kontrol etken Qırım Yüksek mahkemesinde mart 29-da «fevral 26 işi» iştirakçileriniñ apiske alınmasından berilgen apellâtsion şikâyetleri boyunca üç toplaşuv olıp keçti. Mahkemeciler aprel 6 ve 7 künlerine qadar teneffüsni ilân etkenler. Mahkeme videokonferentsiya şeklinde olıp keçti, Ahtem Çiygoz, Ali Asanov ve Mustafa Degermenci yoq ediler.
Çiygoznıñ adliyecisi Polozov videokonferentsiya qabaatlılarnıñ çıqışlarını toqtatıp yayınlamamağa imkân bere, Rusiyeniñ Qırım Yüksek mahkemesi bu fursatnı qaçırmadı, dep bildirdi.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Ukraina Yuqarı Radası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
