Kyivde mart 31-de Dünya teatr künleri munasebetinen «AUTONOMOUS» medeniyet merkezinde «Teatrniñ açılış künü» sergisini taqdim etecekler.
«Bugün bir çoq teatr ressamınıñ eserini taqdim etecekmiz. Qırımdaki teatr aqqında aytmaq isteymiz, çünki Qırım – çoq medeniyetli, anda teatrniñ inkişaf devirleri oldı. Teatrniñ sırları, çoqusı allarda seyirci körmegen «perde arqasında» qalğan şeylerni aytacaqmız», – dep ayttı «Qırım evi» tedbir bölüginiñ reberi Vitaliy Zaharçuk Qırım.Aqiqatqa.
Sergide üç teatr ressamınıñ eserleri numayış etilecek – Yekaterina Korneyçuk, Aleksey Vakarçuk ve Boris Firtsaknıñ işleri. Dünya klassikasınıñ sanalaştırmaları, qıyafet örnekleri ve sana donatmaları taqdim etilecek.
«PostPlayTeatrniñ» «Köçip kelgenniñ teatri» ile beraber yapqan «16+» sanalaştırması numayış etilecektir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
