Türkiyeniñ paytahtı Ankarada aprel 14-15 künleri İslâm işbirligi teşkilâtı devletleriniñ yolbaşçıları sessiyası ötkerilecek, tedbirde qırımtatar halqınıñ liderleri Mustafa Cemilev ve Refat Çubarov iştirak etecekler.
«İşğal ve işğalcilerniñ yapqanlarını aytacaqmız. 2014 senesi mart 27-de işğal etilgen Qırımnı azat etmek talabı boyunca rey berüvde (BMT Baş assambleyasınıñ rezolütsiyası – QA) islam memleketleriniñ yalıñız 21 devleti Ukrainağa qoltuttı, ekseriyeti rey bermedi, Suriye ve Sudan ise Rusiyege qoltuttılar. Böylece bizler İslâm teşkilâtınıñ baş kâtibi ile islam devletleriniñ yolbaşçılarınen körüşip vaziyetni añlatmaq kerek olğanını aytqan edik», – dep añlattı Mustafa Cemilev Qırım.Aqiqatqa.
İslâm işbirligi teşkilâtı – islam memleketleriniñ halqara teşkilâtıdır, eñ büyük ve eñ itibarlı resmiy musulman halqara ükümet teşkilâtı ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
