Ukraina Yuqarı Radası Birleşken Milletler Teşkilâtı, Avropa parlamenti, Avropa Şurası Parlament assambleyası ve Avropada havfsızlıq ve işbirlik teşkilâtı Parlament assambleyasını Rusiye işğal etken Qırımda qırımtatarlarnıñ aq-uquqları bozulğanını takbih etmege çağırdı.
№4247 qararına cumaaqşamı künü 233 Ukraina halq deputatı qoltuttı, dep haber ete Qırım.Aqiqat mühbiri.
Qarar metniniñ müellifleri halqara teşkilâtlardan qırımtatarlarnı taqip etüv ve ayırımğa oğratuv areketlerini toqtatmaq, em de Qırımtatar Milliy Meclisini yasaq etmege imkân bermemek içün yardım etmege rica eteler.
Muracaat müellifleri – Georgiy Logvinskiy («Narodnıy front» fraktsiyası ), Börislav Bereza (fraktsiyadan tış), İgor Lutsenko («Batkivşçina»), İgor Skuratovskiy (Radikal firqa), Aleksey Gonçarenko («Petro Poroşenkonıñ Bloku» fraktsiyası), Yelena Sotnik («Samopomiç»).
Ukraina prezidentiniñ qırımtatar halqı işlerinden vekâletlisi Mustafa Cemilev Qırım.Aqiqatqa izaat berip qayd etti ki, qarar maqsadı – halqara toplulıqqa işğal etilgen Qırımda qırımtatarlarğa basqı artqanını hatırlatmaqtır.
«Qarar maqsadı – işğalci akimiyetniñ Qırımda yapqan qanunsız areketlerine halqara teşkilâtlarnıñ diqqatını celp etmek. Bir çoqu bizge qoltuttı. Bugün Yuqarı Rada kene muracaat ete... halqara qurulışlardan yardım istey. Maña köre, istilâcığa qarşı yañı cezalar olmaq kerek», – dedi Cemilev.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
