Ukraina prezidentı Petro Poroşenko Amerika Qoşma Ştatlarında iş ziyareti ile buluna, dep bildire Ukraina devlet yolbaşçısınıñ resmiy saytı mart 31-de gece.
Ukraina prezidenti Washingtondaki nükleer havfsızlığı sammitinde ve «Ukrainanıñ azatlıq oğrunda küreşi» forumında iştirak etecek.
«Prezident AQŞ reberligi, şu cümleden prezident muavini Joseph Biden, ticaret naziri Penny Pritzker ve maliye naziri Jack Lew, AQŞ mudafaa-sanayı kompleksi şirketleriniñ reberlerinen körüşecek», – dep aytıla haberde.
«Petro Poroşenko Poloniya prezidenti Ancey Duda, Felemenk baş naziri Mark Rütte, Argentina prezidenti Maurisio Makri, BMT baş kâtibi Pan Gi Mun ve Avstraliya tışqı işler naziri Cüli Bişop ile körüşecek», – dep qayd etile.
Mart 31-de ve aprel 1-de Washingtonda keçirilecek nükleer havfsızlığı sammitinde 50 devletniñ yolbaşçısı iştirak etecektir. Forumnıñ esas mevzusı – bölüne bilir malzemelerni ekstremistlerden nasıl etip uzaqlaştırmaq mümkün. Rusiye tedbirde iştirak etmek, Washington Moskvanıñ bu adımına «imkânnı qaçıruv» dedi.
