Ukraina prezidenti Petro Poroşenko Milliy havfsızlıq ve mudafaa şurası qabul etken qararnı imzaladı, böyle etip Nadejda Savçenko, Oleg Sentsov, Aleksandr Kolçenkoğa qarşı cinaiy işlerge alâqası olğan şahıslar cezalanacaq.
Ukraina prezidentiniñ matbuat hızmeti bildire ki, işbu buyruq derc etilgeninen işke tüşürile.
Ukraina RNBO qararına binaen, cedvelde iqtisadiy ve diger sıñır cezalarına oğraycaq şahıslarnıñ adları mevcut. Bundan ğayrı, Ukraina tışqı işler nazirligi Avropa Birligi, AQŞ ve diger devletlerge aynı cezalarnıñ kirsetilmesi aqqında haber etecek.
Fevral ayında Ukraina öz vatandaşlarına qarşı qanunsız taqip işlerini alıp barğan şahıslarğa nisbeten «Savçenko-Sentsov cedvelini» azırlay, dep bildirilgen edi.
Mart 22-de Rostov vilâyetiniñ Donetsk şeeri mahkemesi Ukraina vatandaşı Nadejda Savçenkonı 22 yılğa qadar apiske aldı. Nadejda Savçenkoğa «sıñırnı qanunsız alda keçkeninden» 30 000 rublelik para cezası berili. Mahkeme Savçenkonı eki Rusiye jurnalistiniñ öldürüvi ile qabaatladı.
Mart 23-te Poroşenko RNBO toplaşıp, Savçenkoğa çıqarılğan üküm sebebinden cezalarnı tasdıqlamalı, dep bildirdi.
Mart 24-te Ukraina Nazirler şurası RNBO «Savçenko cedvelini» qabul etip baqmağa başladı.
Keçken sene avgust 25-de Rusiye mahkemesi ukrain rejisseri Oleg Sentsovğa 20 yıl apis cezasını berdi. Faal Aleksandr Kolçenko 10 yılğa qadar azatlıqtan marum etildi. Olarnı Qırımda terakt azırlaması ile mahküm ettiler. Ekisi de qabaatlarını red etip, iş siyasiy sebeplerden açılğanını bildire.
