Link açıqlığı

Ukraina demir yol naqliyatınıñ devlet memuriyeti («Ukrzaliznıtsâ») mayıs bayramları qatnaycaq qoşma trenlerni belgiledi, olardan biri Novoalekseyevkağa qadar ketecek. Bunı matbuat hızmeti bildire.

«282 nomeralı Kiyev-Novoalekseyevka qoşma treni aprel 29-da ve mayıs 2-de yolğa çıqacaq. Kiyevden saat 21:56-da çıqıp, saat 13:13-te Novoalekseyevkağa kelecek. Aprel 20-da ve mayıs 3-te trenler qaytacaq. Saat 15:05-ta çıqıp, Kiyevde saat 04:50-de olacaq», – dep aytıla haberde.

Al-azırda eskiden Aqmescitke qadar ketken 12 nomeralı tren Novoalekseyevkağa qatnay. Novoalekseyevka Herson vilâyetinde Rusiye işğal etken Qırım ile sıñırda yerleşmekte.

2014 senesi dekabr ayında Ukraina yarımada ile transport alâqalarını üzdi. Qırım işğalinden sebep yolcularnıñ havfsızlığını teminlemek içün «Ukrzaliznıtsâ» trenlerniñ Novoalekseyevka ve Hersonğa qadar qatnaycağını ilân etti. Bundan ğayrı, 2014 senesi dekabr 26-dan itibaren Ukrainanıñ esas qısmı ve Qırım arasında bir de bir yükn demir yol naqliyatı vastasınen taşımaq yasaq etile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG