Rusiye nezaret etken Kezlev şeeriniñ prokuraturası mahkeme üzerinden provayderden bir sıra siteniñ qapatılmasını talap ete. Prokuraturanıñ matbuat hızmeti bildire ki, sekiz saytta özüni öldürmek ve narkotik qullanmaq usulları mevcut.
«İnternet ağı teşkerilgen soñ özüni nasıl öldüre bilmek mümkün olğanını añlatqan 100 usul, em de narkotik satılğan yer, fiyatı ve ödeme usulları ile sekiz sayt tapıldı», – dep aytıla hızmetniñ haberinde.
Moskva tayin etken Kezlev prokurorı mahkemege «uquqqa zıt kelgen internet saifeleriniñ blok etilmesi içün malümatnıñ yasaq etilmesi aqqında» dava açtırdı.
Rusiyege boysunğan Kezlev prokuraturasınıñ davasına esaslanıp qabar nasıl berilecek ve nasıl alınacaq tevsiyelerini aydınlatqan saytlar qapatıldı.
Aynı o künü yarımadada «15 minut» sitesi blok etildi. Saytqa kirgende kiriş sıñırlanğan, dep yazıla. Bunıñ sebebi aydınlatılmay, «mahkeme qararı ya da Rusiye Federatsiyasınıñ qanunları belgilegen diger sebepler» bar, dep aytıla.
Qırımda mahkeme ve Roskomnadzor qararınen qapatılğan saytlar olğan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
