Link açıqlığı

Saatnıñ esas haberi

İslâmov: memuriy sıñırda «Asker»niñ hızmeti Qırım qaytarılmasında daa bir adımdır


Qırımnen memuriy sıñırda «Asker»niñ faaliyeti sade grajdanlarğa Qırım qaytarılması içün daa bir adım atılğanına ümüt bere. Böyle fikrini Qırım.Aqiqat radiosınıñ aqşam yayınında Qırım grajdanlıq blokadasınıñ ştabı reisi Lenur İslâmov bildirdi.

«Olar tek bir kün sıñırda çalıştı ve şimdi bir - de - bir iddia yoqtır. Amma bizim anda bulunğanımız insanlarnı pek quvandıra, bu duyğularnen paylaşmaq istegenler de yanımızğa kelmekte. Vatandaşlıq nezareti adamlarğa ümüt bere, biz sıñırğa, işğalcilerge daa yaqın oldıq, demek Qırımnıñ qaytarılmasına da yaqlaşamız», - dep ayttı İslâmov.

İslâmovnıñ qayd etkenine köre, «Asker»bir çoq vazifelerni eda etmekte. Misal olaraq, informatsion ya da tıbbiy yardım kerek olsa, faallerge muracaat etmek mümkün.

Öz tarafından Devlet sıñır hızmetiniñ yolbaşçısı muavini Öleg Slobodânnıñ qayd etkenine köre, şimdiki vaqıtta sıñırda hızmet etken bütün faaller, iş başına keçmezden evel, Ukraina qanunlarınınen tanış oldı.

«Faaller sıñırda hızmet etip başlamaq içün, ilk evelâ azırlıq körip, imtian tapşırmaq kerek ediler. Esasında azırlıq Ukraina qanunları, sıñır nezareti ile bağlı edi», - dep ayttı Slobodân.

Mart 28 kününden başlap, Qırım blokadasından ibaret olğan «Asker» grajdanlıq şekillenmesi, Ukraina devlet sıñır hızmetinen birlikte, işğal etilgen yarımadanen memuriy sıñır noqtalarında hızmet etip başladı. Bütün faaller mahsus tasilni alıp, saylamadan keçtiler.

2015 senesiniñ sentâbr 20 qırımtatarlarnıñ teşebbüsi ile, Qırım sıñırından keçken aşaiyt mallarınen tolu olğan yük maşnalarınıñ müddetsiz blokadası teşkil olunğan edi. Noyabr ayında onıñ ekinci basamağı - energetik blokadası başlanğan edi.

2016 senesiniñ yanvar ayında Qırım blokadası boyunca aktsiya öz formatını deñiştirdi. Blokada iştirakçileri ukrain sıñırcıları ve «Asker» adlı birleşmesinen beraber umumiy areketlerni teşkil etmege planlaştırdılar. Ukraina sıñır hızmetiniñ spikeri Öleg Slobodân bildirgenine köre, mahsus azırlıq körgen 60 faaller arasında 33 sınavnı tapşırdı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG