Advokat Nikolay Polozov, mart 29 künü Qırımda keçirilecek eki makeme oturışı aqqında bildirdi. Olar, «fevral 26» işi ile bağlıdır.
Bundan evel, advokat, Rusiye nezareti astında bulunğan Qırım makemesiniñ qararına qarşı appelâtsiya berdi.
«Añlaşılğanına köre, Qırım Yuqarı makemesi Genri Fordnıñ tehnologiyasınen tanış oldı. İtiraz arizam 29.03 saat 12:00 baqılacağı aqqında vesiqa aldım. Böyleliknen, oturışlar saat 10:00 ve 12:00 keçirilecek. Makeme konveyeri», - dep yazdı o, Feysbuk saifesinde.
Bundan evel, Polozov, yazılğan itiraz arizası boyunca makeme oturışı salı künü keçirilecegi aqqında bildirgen edi. Belli ki, itiraz, makemeci Galina Redko, Ahtem Çiygozğa, Ali Asanovğa ve Mustafa Degermencige qarşı öz istegi ile ve qanunsız şekilde apiste bulunma vaqtını uzatqanınen bağlı.
Keçenlerde, Rusiye advokatı Nikolay Polozov Rusiye Baş prokuraturasına Çiygoznıñ Aqmescit SİZOsında qanunsız tutılması boyunca muracaat yazdı. Delil olaraq, yanvar 25 künü Qırım Yuqarı Makemesinen çıqarılğan qararğa köre, Ahtem Çiygoz ve «fevral 26» işiniñ başqa faaleriniñ apiste tutılması müddeti mart 9 künü 00:00 saatte bitkenini ketirdi.
Öz arizasında advokat, Çiygoznıñ аpis etüv vaqıtını üç künge uzatqan Kreml nezareti astında bulunğan Qırım Yuqarı Makeme makemecisi Galina Redkonı mesülietke çekmege talap etti.
Mart 24 künü Rusiye nezareti astında bulunğan Qırım Yuqarı Makemesi, Qırım prokuraturasınıñ appelâtsiyasını qabul etmedi. Belli ki, prokuratura, mabüslerge qabaatlayıcı ükümni çıqarmaq içün, cinaiy işni makemege qaytarmağa talap etti. Bunıñnen bir sırada, Qırımdaki makeme «fevral 26» işiniñ mabüslerini aprel 24 kününe qadar apiste qaldırdı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
