Link açıqlığı

Saatnıñ esas haberi

Uquq qoruyıcılar Nazirler Şurasınıñ memurlarını Qırım blokadası içün cinaiy işke çekmek isteyler


«Fevral 20 uquq qoruyıcı gruppası» adlı cemaat teşkilâtınıñ icra reisi Dmitriy Nezviskiy, Qırım Prokuraturasına ve Qırımdaki Ukraina Milliy Politsiyasınıñ baş komitetine muracaat yolladı. O, Nazirler Şurasınıñ №1035 Qararı, Qırımğa ve Qırımdan mallarnıñ keçirilmesi yasağı ile bağlıdır.

Nezviskiy, mezkür qararnı işlep çıqarğan ve qabul etken Nazirler Şurasınıñ resmiy şahıslarını cinaiy mesülietke çekmege muracaat ete.

«Ukraina Nazirler Şurasınıñ resmiy şahıslarına qarşı ariza yazdım. Olarnıñ tarafından yapılğan areketler, mında №1035 qararnıñ işlenmesi ve qabul etilmesi aqqında söz yürütilmekte, Ukraina Qanunmesiniñ 161, 367 ve 367 maddelerine köre, cinayet olaraq sayıla bile. Qabul etilgen qarar sade qırımlılarnıñ sıñırdan keçmesini zorlaştırdı», - dep yazdı o, Feysbuk saifesinde.

Yanvar ayında Nezviskiy, Kiyev şeheriniñ memuriy makemesine №1035 qararı qanunsız olaraq qabul etilmesi ve onıñ yasaq etilmesi içün, ariza yazıp, dava açtı. Makeme qararı şimdilik yoq.

Ukraina Nazirler Şurasınıñ tarafından qabul etilgen, Qırım yarımadasına mallarnıñ keçirilmesiniñ yasağı boyunca qarar, 2016 senesiniñ yanvar ayından başlap ömürge keçirildi. Qararğa köre, Qırımğa aşayt ya da başqa şahsiy şeylerniñ keçirilmesi yasaq etilgen. Umumen alğanda, şahsiy eşyalar arasında yasaq etilgen 23 tane mal bardır.

Qırım blokadasınıñ iştirakçileri, Qırımğa er angi mallarnıñ keçirmemesini talap ettiler. Blokada, 2015 senesiniñ sentâbr 20 kününden başlap çalışıp başladı.

XS
SM
MD
LG