Moskvanen tainlengen Aqyar akimiyeti, yerli «Belbek» adlı avalimanı içün 1,6 mlrd ruble ayırmağa azır. Bu aqta mart 25 künü, «Admiral» adlı gazeta bildirdi.
Belli olğanı kibi, Aqyar akimiyeti, «Belbek» avalimanına vade etilgen paranı ayırıp, «Aqmescit halqara avalimanı»nıñ aktsioner cemiyetine kirecek ola.
Şeher memuriyetiniñ fikirince, «Belbek» umumiy ceetten qullana bilecek (em arbiy, em de grajdanlıq tarafından), bunıñnen bir sırada Aqmescit avalimanınıñ bir qısım yüküni özüne alacaq.
Paranıñ bir qısmı şahsiy yatırımcıdan kelecek, başqa qısmını ise şeher memuriyeti özü ödeycek, o ise, 1,6 mlrd rubleni teşkil etecek.
2014 senesiniñ baharinde Qırım işğal etilgen soñ, Aqyardaki Rusiye akimiyeti, bir qaç kere «Belbek» avalimanını çalıştırmağa vade etti. Şimdiki vaqıtta mezkür avaliman rusiye arbiy aviatsiya tarafından qullanılmaqta.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
