Kreml nezareti astında bulunğan Canköy şeheri memuriyetiniñ fikirince, qanunsız qurılğan ticariy obyektler, yıqtırılmaq kerek.
Mezkür obyektlerniñ cedveli Canköy şeher memuriyetiniñ resmiy saytında berilgen.
Haber etilgeni kibi, bu binalar, 2014 senesi noyabr 25 künü Qırım nazirler Şurasınıñ alınğan qararı ile yıqtırılacaqlar. Qararda qanunsız olğan ve kapital qurucılıqnıñ obyektleri olmağan bütün binalarnıñ topraqları boşatılmaq kerekligi aqqında söz yürütilmekte.
Canköy şeheriniñ memuriyeti bildirgenine köre, qanunsız qurılğan ticariy noqtalar 2016 senesiniñ aprel 11 - 30 künleri arasında yıqtırılacaq.
Qırımda, yerli memurlarnıñ qararları ile qanunsız qurulğan binalarnıñ yıqtırılması sıq rast kelip başladı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
