Moskva nezareti astında bulunğan Qırım akimiyetiniñ kurort ve turizm nazirliginiñ yolbaşçısı Sergey Strelbitskiy, mayıs ayında yarımadada olacaq istiraat fiatlarını seslendirdi.
Matbuat hızmeti bildirgenine köre, Strelbitskiy böyle fiatlarını «raqiplik köstere bilecek» kibi tanığan.
Böyleliknen, berilgen malümatlarğa binaen, mayıs ayında sanatoriyde raatlanmaq içün,bir insanğa putövkanıñ fiatı 2 583 rubleni teşkil etecek. Mında üç kerelik yemek ve Qırım yalısında teklif etilgen tedaviylev köz ögüne alınmaqta. Qırımnıñ ğarp taraflarında fiatlar - 2 433 ruble, Şarqta ise - 2 125 rubleni teşkil etecek.
Yalıda kiranıñ fiatı 24 saat içün 930 rubleden, Ğarpta - 808 rubleden, Şarqta - 1 012 rubleden başlap olacaq.
Mini - musafirhanelerdeki fiatlar, eki insan içün, Qırım yalısında 2 478 rubleden, Ğarbiy Qırımda 1 777 rubleden, Şarqiy Qırımda 2 062 rubleden başlap olacaq. Mında saba yemegi közde tutıla.
Hızmette vade etkenleri kibi, Qırım yalısında eki kişilik üç yıldızlı ötellerde fiatlar 5 500 rubleden başlap olacaq, ğarbiy Qırımda 3 940 rubleni ve Şarqiy Qırımda 3 800 rubleni teşkil etecek.
Keçenlerde, kurort hızmetiniñ yolbaşçısı haber etkeni kibi, 2016 senesiniñ mayıs ayından avgust ayına qadar qırım musafirhanelerinde oda ayırtması miqdarı 20% ösken.
Mart 25 künü Ukraina milliy bankına köre, 10 ruble 3,8084 grivnanı teşkil etmekte.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
