Qırımnıñ Aqmeçit rayonında mart 25 künü yüz bergen qaza neticesinde, eki köy tolusınen ve bir köy qısmen yarıqsız qaldı. Bu aqta Rusiye nezareti astında bulunğan Qırım akimiyetiniñ saytında bildirilmekte.
«Aqmeçit rayonınıñ memuriyeti haber etkenine köre, elektrik ağınıñ qazaiy söndürülmesinden soñ, Aq Qoca, Camal, Kirovskoye köyleri yarıqsız qaldı», - dep aytıla mesacda.
Matbuat hızmeti qayd etkenine köre, yüz bergen qaza sebepleri şimdiki vaqıtta belgilenmekte.
2015 senesiniñ dekabr 30 künü, Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüriniñ yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
