Link açıqlığı

Rusiye tarafından işğal etilgen yarımadada Rusiyeniñ mahsus hızmetleri, qırımtatarlarnı sorğularğa çıqarmağa devam eteler. Milliy Qurultayınıñ icra Komiteti reisi Zair Smedlâyevniñ bildirgenine köre, mezkür sorğular Qırım blokadasınıñ teşebbüsçilerinden biri, «Lenur İslâmovnıñ işi» ile bağlı.

«Bugün qırımtatar halqınıñ Revizion komissiyasınıñ azası Remzi Muratov Rusiyeniñ UFSB bölüginde keçirilgen sorğuda şaat olaraq keçti. Taqiqatçı Talışev, Remzi Muratovnı Lenur İslâmovğa qarşı açılğan işi boyunca sorğuğa çekti. Qurultay azası advokat Cemil Temişevnen beraber edi», - dep yazdı Smeydlâyev Feysbuk saifesinde.

Bu aqta Qırımdaki rus uquq qorçalayıcılarnıñ resmiy izaatları yoq.

2015 senesi dekabr ayında Rusiye nezareti astında bulunğan Qırım prokurorı Natalya Poklonskaya haberr etkeni kibi, Qırım blokadasınıñ koordinatorı Lenur İslâmovğa qarşı ğıyabiy şekilde diversiyada qabaat belgilengen edi.

2015 senesiniñ sentâbr 20 qırımtatarlarnıñ teşebbüsi ile, Qırım sıñırından keçken aşaiyt mallarınen tolu olğan yük maşnalarnıñ müddetsiz blokadası teşkil olunğan edi.

2016 senesiniñ yanvar ayında Qırım blokadası boyunca aktsiya öz formatını deñiştirdi. Blokada iştirakçileri ukrain sıñırcıları ve «Asker» adlı birleşmenen beraber umumiy areketlreni teşkil etmege planlaştıralar.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG