Link açıqlığı

Rusiye nezareti astında bulunğan qırım akimiyeti, yarımadada İsmil Gasprinskiyniñ añına ötkerilgen bir sıra tedbirler aqqında haber etti. Olar mütefikkirniñ 165 yıllığına bağışlanğan.

Böyleliknen, matbuat hızmeti bildirgenine köre, Bağçasarayda «İsmail Gasprinskiyniñ yıllığına 165 lâle» adlı aktsiya keçirildi.

«İsmail Gasprinskiyniñ abidesi ögünde 165 lâle saçılğan, mezarlığı yanında dualar oqulğan», - dep ayttılar hızmette.

Aqmescitte «Mütefikkir. Neşriyatçı. Vatanperver.» adlı aqşam keçirildi. Onıñ çerçivesinde mektep talebeleri «Keçmişiñnen ğururlañ» serlevalı taqdimni ötkerdiler. Kitap sergisinde çeşit yıllarnıñ neşirleri taqdim etildi. Olar rus, qırımtatar ve frenk tilindedir.

İsmail Gasprinskiyniñ hatırasına tedbir qırımtatar kitaphanesi ve qırımtatar tarihiy - medeniy mirası müzeinde de keçti.

İsmail Gasprinskiy (1851 – 1914) – ulu qırımtatar mütefikkirdir. Cadidizm ve pantürkizmni teşkil etken biri.

İsmail bey Gasprinskiy 1914 senesi sentâbr 11 (24) künü vefat etti ve Bağçasaraydaki Zıncırlı medrese azbarında defin olundı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG