Kreml nezareti astında bulunğan Qırım akimiyeti yerli sakinlerni yarımadada binalarnıñ yıqtıruvınen tarik ete, qırımtatarlar ellerine silâ alğanlarını istey, çünki böyle etip halqqa qarşı küçniñ qullanması aqlana bilir. Böyle fikirini Qırım.Aqiqat radiosınıñ yayınıda qırımtatar halqınıñ aqları qorçalaması boyunca Komitetiniñ koordinatorı Sinaver Kadırov izaatladı.
«Olar, (qırım akimiyeti) zıddiyetni barışıqnen çezmege istemeyler. Vaziyetni patlatmaq, insanlar hucur areketlerni yapıp başlağanlarını isteyler. Saña qarşı silânı alsalar, seni de aynısını yapmağa mecbur eteler. İşte bundan saqınmaq kerek. Çünki olar ilâki bunı bekleyler, böyleliknen yerli cemaatqa qarşı yapılğan cismen ucum aqlana bilir», - dep ayttı Sinaver Kadırov.
Evel haber etilgeni kibi, mart 23 künü Sudaq şeherinde qırımtatarlarnıñ 6 tane evleri ve bazarı yıqtırılacaq edi. Alçaq massivine qırımtatarlarnıñ evlerni yıqtırmaq içün, 100 - ge yaqın silâlı uquq qorçalayıcılar keldi. OMOn ve makemeciler bir qaç saatten soñ massivni terk ettiler. Yerli akimiyet qırımtatar evleriniñ saiplerine kompromiss variantını teklif etti, evler yer yüzünden silingenini istemeseler, on kün içinde 76 mln. ruble ödemek kerekler ya da binalar mecburen yıqtırılacaq.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
