Link açıqlığı

Rusiye nezareti astında bulunğan Qırım akimiyetiniñ yolbaşçısı Sergey Aksönov, Qırımdaki mallarnıñ fiatları Krasnodar yeri ve Rostov vilâyetindekilerinden de yüksek olğanını bildirdi. Bu raqam tahminen 30-50% civarındadır. Onıñ fikirince, böyle vaziyet naqliyat logistikası sebebinden yüz beremez.

Qırım.Aqiqat agentligi haber etkeni kibi, bu aqta yolbaşçı Nazirler Şurasınıñ toplaşuvı devamında ilân etti.

«Ayırı aşayt malları Krasnodar yeri ve Rostov vilâyetlerinden 30-40%, makaron - 46% - ğa yüksek. Arqadaşlar, konkret malğa paranı yatırmaq içün, logistika o qadar aqça masraf etkenine inanmayım. İnanmayım», - dep ayttı Aksönov.

Onıñ muavini Vitaliy Nahlupinniñ haber etkenine köre, şimdiki vaqıtta malnıñ fiatı nege esaslanıp çıqarılğanı boyunca tedbirler keçirilmekte. İmkân olsa, bu bilgiler nevbetteki Nazirler Şurasınıñ toplaşuvında berilecek.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG