Aqmescitniñ Şpolânskaya soqağında yerleştirilgen beş qatlı eviniñ dam qısmı yıqıldı.
Bu aqta, Rusiye nezareti astında bulunğan Aqmescit memuriyetiniñ matbuat hızmeti bildirmekte.
«Aqmescitte, küçlü yelniñ sebebinden, Şpolânskaya soqağında yerleştirilgen beş qatlı eviniñ dam qısmı yıqıldı. Bizim hızmetlerimiz acele sürette qaza olğan yerge barıp, yolnı açtılar, territoriyanı sıñırlap, er şeyni temizlediler. Yaralanğanlar yoq», - dep ayttı MUP «Kiyevskiy Jilservis» niñ reisi Öleg Küzmin.
Onıñ qaydlarına köre, binanıñ tamir işleri eki kün içinde keçirilecek.
Keçenlerde, şeer memuriyeti, sakinlerni avanıñ bozulması aqqında tenbiyeledi.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
