Link açıqlığı

Saatnıñ esas haberi

Azatlıq Radiosı qırımtatar cumhuriyeti mevzusında olğan programmanı yayından çıqarmadı


Azatlıq radiosı qırımtatarlarnıñ cumhuriyeti mevzusında programmanı yayından çıqarmadı. Bu aqta, Azatlıq radiosınıñ ukrain redaktsiyası reisi Maryana Draç bildirdi. Böyle izaatnı o, ATR telekanalınıñ haberler bölügi yolbaşçısı Osman Paşayev ve mezkür telekanalınıñ müdiri muavini Ayder Mujdabayev Qırım.Aqiqat agentliginiñ reberiyetine ve Azatlıq Radiosınıñ Ukrain redaktsiyasına muracaat yazğan soñ berdi.

«Qırımtatar cumhuriyeti mevzusı efirden çıqarılmadı, onı başqa künge keçirdiler. Leyhanıñ prodüsseri Yekaterina Nekreçaya bildirgeni kibi, Osman Paşayev vaqtında muzakere etilecek mevzu boyunca bildirme yapmadı. Bizim redaktsiyamız, bir çoq kere yayında qırımtatar cumhuriyeti mevzusını kötergen edi», - dep añlattı Maryana Draç.

Azatlıq radiosınıñ ukrain redaktsiyası yolbaşçısı hatırlatqanı kibi, aynı Osman Paşayev 2015 senesi dekabr 31 künü bu mevzuda yayınnı keçirgen edi.

Onıñ qaydlarına köre, ukrain redaktsiyası qırımtatar telekanalınıñ işdeşlerine büyük ürmetnen davranalar.

Olar, defalarca telekanalğa qarşı yapılğan basqıncılıq aqqında ilân etip, kerek olğan vaqıtta Kiyevdeki öz studiyasını teklif etkenleri aqqında hatırlattı.

Bunıñnen bir sırada, Maryana Draçnıñ qaydlarına binaen, 2015 senesiniñ dekabr ayından başlap, ATR telekanalınıñ jurnalisti Pragada, Vatslav Gavela stipendiyası çerçivesinde stajlavnı keçmekte.

«ATR haberler bölüginiñ baş muarriri Osman Paşayev, 2015 senesiniñ soñundan başlap, Qırım.Aqiqat radio leyhasınen işbirlik tutmaqta. O, yayında qırımlılar içün müim olğan meselelerni kötermekte. Azatlıq Radiosı bu işbirlikniñ qıymetini bile, amma aynı zamanda hadimler, spikerler ilk evelâ bizim redaktsion standartlarını ve işniñ qaidelerini yerine ketirmek kerekler», - dep qayd etti Azatlıq Radiosınıñ ukrain redaktsiyası müdiri.

Maryana Draç haber etkeni kibi, Qırım.Aqiqat leyhasınıñ reberi Vladimir Pritula şimdiki vaqıtta tatilde bulunmaqta, onıñ Ayder Mujdabayev ile feysbuk saifesinde subeti şahsiy mevamıdır, o ise, redaktsiyanıñ noqta-i nazarı ile kelişmey bile.

«İşdeşler adiselerni bir sırağa tizgenleri içün yazıqsınam», - dep ayttı o. ATR telekanalınıñ baş müdiri muavini Ayder Mujdabayev bu sene bir qaç kere musafir olaraq Azatlıq Radiosına davet etilgen edi. Bunıñnen bir sırada, Qırım.Aqiqat leyhası, 2014 senesiniñ dekabr ayından başlap, Ayder Mujdabayevge, onıñ blogları içün mahsus yer ayırmaqta.

«Azatlıq radiosı Ukrainanıñ kelime azatlığına sadıq qalmaqta, bir qaç sene ise aynı bu printsipni tasdıqlamaq içün çalışmaqta. ATR telekanalınen bir noqta-i nazarda olğanımızğa işanam», - dep, yekün çıqardı Maryana Draç.

Bundan evel, ATR telekanalınıñ Zaman haberler bölüginiñ baş muarriri Osman Paşayev ve ATR telekanalınıñ baş müdiri muavini Ayder Mujdabayev, feysbuk saifesinde Qırım.Aqiqat saytınıñ reberiyetine, Azatlıq Radiosına (Ukraina) ve Pragadaki Azatlıq Radiosınıñ avropa bölügine muracaat yazdı. Mezkür muracaatta Qırım.Aqiqat leyhasınen işbirlikniñ toqtatılması aqqında söz yürütüldi. Sebebi Osman Paşayevniñ qırımtatar cumhuriyeti mevzusında programmanıñ yayından çıqarılması oldı.

XS
SM
MD
LG