Link açıqlığı

Saatnıñ esas haberi

Sudaqtaki evler saiplerine «kompromiss» olaraq 76 mln. rubleni ödemege teklif ettiler - Smedlâyev


Yerli akimiyet Sudaqnıñ «Alçaq» massivinde qırımtatar evleriniñ saiplerine kompromiss variantını teklif etti, evler yer yüzünden silingenini istemeseler, on kün içinde 76 mln. ruble ödemek kerekler ya da binalar yıqtırılacaq. Bu aqta mart 23 künü Qurultayınıñ icra komiteti reisi Zair Smedlâyev bildirdi.

«Bir şahıs bu yerni begengeni içün, şeer şurasında kompromiss olaraq tapıp çıqarılğan qarar, evlerniñ saiplerine iç bir taraftan uyğun kelmey! Bazıları quvançnen: «yaşa» evlerimiz daa on kün turacaq,- deyler, başqaları ise, «yaşa-maşa yoq», ya da siz on kün içinde 76 mln.ruble ketiresiñiz ya da evleriñizni yıqtıracaqmız. Ne yaşası şu, yalıñız qararnı biraz uzattıq, - dep aytalar», - qayd etti Smedlâyev.

Zair Smedlâyevniñ bildirgenine köre, akimiyet, Rusiye tarafından qırımtatarlarnıñ aqlaması qararı aqqında defalarca aytqanlar, amma kerçekte, bu künge qadar yerli halqqa sürgünlikten soñ marum etilgen mal - mülkü qaytarılmağan.

«Şeer akimiyetiniñ tarafından mezkür meselesiniñ böyle çezilüvi, Rusiye prezidenti Qırımdaki status ve başqa şeyler aqqında aytqan gür sözleriniñ ömürge keçirilüvi boyunca kösterici olacaq. Baş yazısını köz körer», - dep qayd etti Smedlâyev.

Onıñ qoşma malümatlarına binaen, başqa yerlerde de böyle vaziyet peyda olmaycağınen bağlı iç bir kefalet yoq, atta Alçaqtaki evlerniñ saipleri paranı tapıp, ödeseler bile, başqa künü olarnıñ toprağına ellerinde vesiqaları olğan başqa saipler kelmeycegini aytmağa mümkün degil.

Kreml nezareti astında bulunğan Qırım akimiyetiniñ saytında bu vaqianen bağlı iç bir malümat berilmey.

Mart 23 künü, Sudaqnıñ Alçaq massivinde qırımtatarlarnıñ 6 tane evini yıqtırmaq içün, 100 - ge yaqın silâlı uquq qorçalayıcılar keldi. Bu aqta Qırım.Aqiqat agentligine qırımtatar milliy Meclisiniñ yolbaşçısı muavini Nariman Celâl bildirdi.

Celâlnıñ sözlerine binaen, mezkür evler çoq yıl evel qurılğan ve kerçekten, qurulışqa ruhset bergen vesiqaları yoq. Amma böyle vaziyet bütün qırım boyunca üküm sürmekte ve tek qırımtatarlarğa ait degil.

Qırımdaki insanlar aq-uquq qoruma gruppasınıñ koordinatorı Abdureşit Cepparovnıñ bildirgenine köre, rusiye askerleri ketti, 150 - den ziyade toplaşqan qırımtatarlar da tarqaldı.

Evel haber etilgeni kibi, mart 23 künü Sudaq şeherinde qırımtatarlarnıñ 6 tane evleri ve bazarı yıqtırılacaq edi.

Tintüv arfesinde Rusiye telükesizlik Şurasınıñ yolbaşçısı Nikolay Patruşev keçirilgen toplaşuv devamında, yarımadada vaziyetniñ destabilizatsiya havfı üküm sürgeni aqqında bildirdi.

Mart 22 künü, Qırımda Qurultaynıñ üç delegatınıñ evlerinde tintüv keçirildi. Aynı bu künü Rusiye Federatsiyasınıñ telükesizlik naziri Sergey Şoygu yarımadağa iş ziyareti ile keldi.

Halqara cemaatçılıqlar bir çoq kere Rusiye tarafından işğal etilgen Qırımda insanlarnıñ, daa çoq qırımtatarlarnıñ aq-uquqları bozulğanları aqqında aytıp, Moskvanı böyle bozuvlarnı toqtatmağa çağırdılar. Rusiye nezareti astında bulunğan Qırım akimiyeti mezkür arizalarnı «ziyade arttırılğan» kibi saymaqta.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG