Link açıqlığı

Mart 23 künü, Sudaqnıñ Alçaq massivinde, qırımtatarlarnıñ evlerni yıqtırmaq içün, 100 - ge yaqın silâlı uquq qorçalayıcıları keldi. Bu aqta Qırım.Aqiqat agentligine qırımtatar milliy Meclisiniñ yolbaşçısı muavini Nariman Celâl bildirdi.

«Anda 100 - ge yaqın uquq qorçalayıcılar bar edi, olarnıñ yarısı silâlı edi. Olar OMON, politsiya ve FSB vekilleridir. Eñ azı 2 kamaz aydap ketirildi. Olar bese-belli bir şey olacağını beklediler. İç bir şey olmadı. Qırımtatarlarnıñ büyük gruppası toplaştı. Aynı askerler miqdarında, belki biraz ziyadedir», - dep tarif etti o.

Celâlnıñ sözlerine binaen, mezkür evler çoq yıl evel qurılğan ve kerçekten, qurulışqa ruhset bergen vesiqaları yoq. Amma böyle vaziyet bütün qırım boyunca üküm sürmekte ve tek qırımtatarlarğa ait degil.

«Olarnıñ evlerini soñki eki yıl içinde resmiyleştirmege ıntıldılarmı yoqmı, haberim yoq, amma olarğa, hususan Sudaq regional meclisiniñ reisi İlver Ametovğa, şimdiki vaqıtta areket etken akimiyetınen ve bazı qırımtatar siyasiy küçleri ile işbirlik tutmağa teklif ete ediler. Söz, akimiyet tarafından işanğan qırımtatarlar aqqında yürütilmekte. Ametov, onıñ öz baqışı ve qatiy işançı bar olğanını bildirip, tekliflerni red etti. Bunıñ neticesinde işte, başında böyle oğursızlıq peyda oldı», - qayd etti Meclis yolbaşçısınıñ muavini.

Onıñ sözlerine binaen, yıqtırılacaq evleriniñ bazı saipleri, Rusiye nezareti astında bulunğan Qırım akimiyetiniñ baş - naziri yardımcısı Ruslan Balbeknen körüşmek içün yol aldılar.

Şimdiki vaqıtta, körüşüv ötkerilgeni aqqında iç bir malümat yoq. Bunıñnen bir sırada, Qırım akimiyetiniñ yıqtırıluvnen bağlı resmiy izaatları da yoq.

Qırımdaki insanlar aq-uquq qoruma gruppasınıñ koordinatorı Abdureşit Cepparovnıñ bildirgenine köre, rusiye askerleri ketti, 150 - den ziyade toplaşqan qırımtatarlar da tarqaldı. Uquq qoruyıcı ileride olacaq bir de bir areketler aqqında aytıp olamadı, çünki «Rusiyeden er şey beklenile bile».

VİDEO: Avdetke ait

Evel haber etilgeni kibi, mart 23 künü Sudaq şeherinde qırımtatarlarnıñ 6 tane evleri ve bazarı yıqtırılacaq edi.

Tintüv arfesinde Rusiye telükesizlik Şurasınıñ yolbaşçısı Nikolay Patruşev keçirilgen toplaşuv devamında, yarımadada vaziyetniñ destabilizatsiya havfı üküm sürgeni aqqında bildirdi.

Mart 22 künü, Qırımda Qurultaynıñ üç delegatınıñ evlerinde tintüv keçirildi. Aynı bu künü Rusiye Federatsiyasınıñ telükesizlik naziri Sergey Şoygu yarımadağa iş ziyareti ile keldi.

Halqara cemaatçılıqlar bir çoq kere Rusiye tarafından işğal etilgen Qırımda insanlarnıñ, daa çoq qırımtatarlarnıñ aq-uquqları bozulğanları aqqında aytıp, Moskvanı böyle bozuvlarnı toqtatmağa çağırdılar. Rusiye nezareti astında bulunğan Qırım akimiyeti mezkür arizalarnı «ziyade arttırılğan» kibi saymaqta.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG