Qırım Yuqarı Makemesinde «Fevral 26» işi boyunca nevbetteki oturışı mart 24 künü keçirilecek. Bu aqta Qırım.Aqiqat agentligine qırımtatar milliy Meclisiniñ yolbaşçı muavini Nariman Celâl bildirdi.
Onıñ qayd etkenine köre, makeme oturışında konkret olaraq nasıl sualler baqılacağını aytmaq qıyındır.
«Öz qanunlarını bozıp, mabüslerniñ üstünde horlavlarnı devam eterler... Er bir oturış, imayecilerniñ arizaları ile başlanmaqta. İmayecilerniñ sayısı çoqtır, altı mabüsleriniñ er birinde advokat bar. Soñki kere, advokatlar, mabüslerniñ üçü apiste üç kün qanunsız şekilde oturğanları aqqında ariza yazdılar. Amma bu ariza baqılmadı. Adet olıp qalğan şey, fikirimce, bu sefer de oturış imayecilerniñ muracaatları ile başlanacaq», - haber etti Celâl.
Onıñ qayd etkenine köre, cinaiy iş pek yavaş ileriley. Taqiqat, şimdi ise prokuratura ve makeme yapqan bozuvlar neticesinde, makemeciler, davacılar ve imayeciler arasında añlaşamamazlıqlar yüz bermekte.
Rusiye nezareti astında bulanğan Qırım Yuqarı Makemesinde mart 11 künü «fevral 26» işiniñ oturışı devamında, Ahtem Çiygoz, Ali Asanovnıñ ve Mustafa Degermenciniñ ceza vaqıtını uzatmaq qararı alınğan edi. Makemeniñ nevbetteki oturışı mart 24 kününe belgilengen.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
