Link açıqlığı

Saatnıñ esas haberi

Yarımadadaki tintüvler Qırım blokadasınen bağlı - Smedlâyev


Milliy Qurultayınıñ İcra Komiteti reisi Zair Smedlâyevniñ fikirince, mart 22 künü yarımadada keçirilgen bir sıra tintüvler, Qırım blokadası işinen ve Lenur İslâmovnıñ şahısınen bağlıdır.

Bu aqta o, Qırım.Aqiqat agentligine bildirdi.

«Duşmannı endi belgilediler, bular ukrainliler ve milletçilerdir, olarnıñ arasında Lenur İslâmov da bar. Bugün Canköy rayonında yaşağan qırımtatar Qurultayınıñ delegatı Remzi Muratovnıñ, Sudağ şeherinde ise Qurultay delegatı Şevket Usmanovnıñ evlerinde titnüvler keçirilmekte. İş adamlarına basım devam etmekte. Menim fikirimce, bu basqı quvetleşecek. Bütün bular qırımtatar halqına, temsil organğa ve başqa razı olmağanlarğa qarşı repressiyalarnı quvetleştirmek içün yapılmaqta», - dep añlattı Smedlâyev.

Smedlâyevniñ haber etkenine köre, belli hızmetler tarafından keçirilgen tintüvler «edalı şekilde» keçti.

«Bir qaç maşnada, maskalarnı taqqan silovikler keldi. Ketirilgen şaatlar sarhoş edi. Özülerini edalı alıp bardılar, qanunsızlıq yapmadılar, bilgisayarnı teşkerdiler, evni narkotik ve silâ olğanına baqtılar, Lenur İslâmovnen bağnı belgilemege tırıştılar», - dep tarif etti Smedlâyev Canköy rayonında olıp keçken tintüv aqqında.

Mart 22 künü, Qırımda Sudaq şeherinde Şevket Usmanov, Canköy rayonında Remzi Muratov Qurultay delegatlarınıñ evlerinde tintüvler olıp keçti.

Bu aqta Qırımdaki rus uquq qorçalayıcılarnıñ resmiy izaatları yoq.

Tintüv arfesinde Rusiye telükesizlik Şurasınıñ yolbaşçısı Nikolay Patruşev keçirilgen toplaşuv devamında, yarımadada vaziyetniñ destabilizatsiya havfı üküm sürgeni aqqında bildirdi.

2015 senesi dekabr ayında Rusiye nezareti astında bulunğan Qırım prokurorı Natalya Poklonskaya haber etkeni kibi, Qırım blokadasınıñ koordinatorı Lenur İslâmovğa qarşı ğıyabiy şekilde diversiyada qabaat belgilengen edi.

Dekabr 3 künü, makeme İslâmovnıñ malını tevqif etti. Belli olğanı kibi, İslâmov ATR qırımtatar telekanalı, «SimSitiTrans» şirketi, «Cast Bank» bankı ve Apple tehnika satılması boyunca tükânlarnıñ saibidir.

2015 senesiniñ sentâbr 20 qırımtatarlarnıñ teşebbüsi ile, Qırım sıñırından keçken aşaiyt mallarınen tolu olğan yük maşnalarnıñ müddetsiz blokadası teşkil olunğan edi.

2016 senesiniñ yanvar ayında Qırım blokadası boyunca aktsiya öz formatını deñiştirdi. Blokada iştirakçileri ukrain sıñırcıları ve «Asker» adlı birleşmenen beraber umumiy areketlreni teşkil etmege planlaştıralar.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG