Link açıqlığı

Mart 22 künü, rusiye uquq qorçalayıcıları tarafından Sudağ şeerinde yaşağan milliy Qurultayınıñ delegatı Şevket Usmanovnıñ evinde tintüv keçirilmekte. Bu malümatnı Qurultaynıñ İcra Komiteti reisi Zair Smedlâyev tasdıqladı. Bunıñnen bağlı Tavsilâtlı malümat berilmemekte.

Usmanov QHA agentiligine haber etkeni kibi, o, şimdiki vaqıtta Kiyev şeerinde bulunmaqta, tintüv keçirilgen evde ise onıñ oğulları ve ömür arqadaşı qalmaqta. Onıñ bildirgenine köre, OMON hadimleri evinden degerli eşya çıqarmadılar, yasaq etilgen şeylerni de evge kirsetmediler.

Evel haber etilgeni kibi, bugün saba Canköy rayonında yaşağan Qurultay delegatı Remzi Muratovnıñ evinde aynı şekilde titnüv keçirildi.

Bu aqta Qırımdaki rus uquq qorçalayıcılarnıñ resmiy izaatları yoq.

Tintüv arfesinde Rusiye telükesizlik Şurasınıñ yolbaşçısı Nikolay Patruşev keçirilgen toplaşuv devamında, yarımadada vaziyetniñ destabilizatsiya havfı üküm sürgeni aqqında bildirdi.

Halqara cemaatçılıqlar bir çoq kere Rusiye tarafından işğal etilgen Qırımda insanlarnıñ, daa çoq qırımtatarlarnıñ aq-uquqları bozulğanları aqqında aytıp, Moskvanı böyle bozuvlarnı toqtatmağa çağırdılar. Rusiye nezareti astında bulunğan Qırım akimiyeti mezkür arizalarnı «ziyade arttırılğan» kibi saymaqta.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG