Qırım tasil saasınıñ keçici zamanını 2019 senesine qadar uzatmaq kerek. Böyle teklifini Cemaat halq cebesiniñ Merkeziy ştabı iş gruppasınıñ yolbaşçısı Lübov Duhanina bildirdi.
Duhaninanıñ fikirince, daa az vaqıt içinde qırım tasil saası Rusiye sistemasına tolusınen kirip yetiştirmeycek.
Kreml nezareti astında bulunğan Qırım akimiyetiniñ ilim, tasil ve gençlik nazirliginiñ yolbaşçısı Natalya Gonçarova haber etkeni kibi, şimdiki vaqıtta, tasil sistemasınıñ turmuş meselelerinden ögretüv keifiyeti mevzularına keçip oldılar.
Gonçarovanıñ bildirgenine köre, cemaat halq cebesiniñ yardımı ile, cumhuriyette aliy tasilniñ sistematizatsiyası ömürge keçirildi. Bunıñnen bir sırada, ocalarnıñ kvalifikatsiyalarını yükseltmek içün kerekli tedbirler keçirilmekte.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
