Kreml nezareti astında bulunğan Qırım makemesi tarafından qırımtatar milliy Meclisiniñ ihtimal «ekstremistik teşkilâtı» olaraq tanılması, qırımtatar halqına cenk ilânı kibi olacaq. Bu aqta Ukraina prezidentiniñ qırımtatar halqınıñ işleri boyunca vekili Mustafa Cemilev bildirdi.
«Meclisniñ ekstremistik teşkilâtı olaraq tanılması qırımtatar halqına qarşı cenkniñ ilân etilmesi kibi olacaqtır», - dep izaatlay Cemilevniñ çıqışını matbuat hızmeti.
Cemilevniñ qayd etkenine köre, Qırım Ukrainağa qaytarılmağanına qadar, yarımadada yaşağan insanlarnıñ uquqlarını qorçalamağa imkânsızdır. «Rusiye Federatsiyası tarafından insaniyetlikke qarşı yapılğan cinayetlerniñ taqiq etilüvi boyunca halqara tribunalı qurılmaq kerek», - dep ayttı Ukraina prezidentiniñ vekili.
Nyü - Yorktaki OON-nıñ ştab kvartirasında, Arriya formulası boyunca telükesizlik Şurasınıñ toplaşuvı keçirildi. O, Qırım boyunca havfsızlıqqa bağışlanğan. Ukraina prezidentiniñ qırımtatar halqınıñ işleri boyunca vekili Mustafa Cemilev, bu toplaşuvda yarımadada üküm sürgen vaziyetini açıqlap, çıqışta bulundı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
