Mart 19 künü, Keriç boğazında «Lira» gemisi Keriç köprüniñ direginen çatıştı.
Qırım.Aqiqat agentligi elde etken malümatlarğa köre, şimdiki vaqıtta, çatışma neticesinde ketirilgen zarar sayılmaqta.
««Lira» gemisi, Tuzla adası ve farvater arasında qurılğan köprüniñ direginen çatışqan soñ, tayamalar bükülgen, ketirilgen zarar sayılmaqta. Yüz bergen qaza köprüniñ yekünlenmesi müddetine tesir etmez», - dep ayttılar matbuat merkezinde.
Mezkür köpür esas qurulış içün yükni taşımağa yardım etecek qoşma inşaat kibi qurılmaqta.
Mart 18 künü Rusiye prezidenti Vladimir Pütin, Kubandan yarımadağa qurıla yatqan köprüniñ iş ketişatını ögrenmek içün Qırımğa kelgen edi.
Keriç boğazından köprüniñ qurılması kerekligi aqqında Pütin ta 2014 senesi, işğalden soñ aytqan edi. Köpür leyhasınıñ baş podrâdçigi «Stroygazmontaj» şirketi oldı. Keriç boğazından keçecek köpürni 2018 senege qurmağa vade etmekteler.
2016 senesi yanvar ayınıñ soñunda, Rusiye akimiyeti Keriç köpüriniñ qurulışında keçikme aqqında ayttılar.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
