Ukraina prezidenti Petro Poroşenko, Avropa Birliginen olacaq vizasız rejimi 2016 senesiniñ ortasında berilecegini bekley. Bu aqta, o, gumanitar meseleleri ve krizis vaziyetleriniñ çezüvi boyunca avropa komissarı Kristos Stilianidesnen keçirilgen körüşüvden soñ bildirdi.
«Brüssel ziyareti devamında, aprel ayında Avropa Şurasına ve Avropa Parlamentine qoşulacaq qanun teklifleri aqqında añlaşma tizildi. Bu tekliflerge köre, Ukraina bu seneniñ ortasında vizasız rejimine nail olacaq», - dep ayttı Poroşenko.
Mart 17 künü Brüsselde Ukraina prezidenti Petro Poroşenkonen keçirilgen körüşüvden soñ, Avropa komissiyasınıñ yolbaşçısı Jan - Klod Yünker bildirgenine köre, Ukraina vizalı rejimi boyunca kerekli olğan şaraitlerni ömürge keçirdi. Bu ise, aprel ayında Avropa komissiyası tarafından Avropa Birligi ve Parlamentine ukrainliler içün vizanıñ lâğu etilmesi boyunca teklifini kirsetmege imkân bere.
