Link açıqlığı

Meclis azaları 2014 senesi Qırımda öldürilgen faali Reşat Ametovnıñ qorantasını ziyaret etti


Qırımtatar milliy Meclisiniñ azaları, mart 18 künü, 2014 senesi esir etilgen ve öldürilgen Reşat Ametovnıñ ailesini ziyaret ettiler.

Bu aqta Meclisniñ matbuat hızmeti bildirmekte.

«Qırımtatar milliy Meclisi azaları ve milliy areket iştirakçileri Ametovlar qorantasını ziyaret etip, merhumnıñ añına dua oqudılar. O, 2014 senesi Aqmescit meydanına çıqıp narazlıqnı bildirdi, bundan soñ samooborona askerleri onı tutıp ketti, neticede Reşat, qıynav izleri ile tapılğan edi», - dep aytıla mesacda.

Belli olğanı kibi, Reşat Ametov 2014 senesi Mart 3 künü Aqmescitteki Qırım Nazirler Şurasınıñ binası yanına kendi narazlıqnı bildirmek içün çıqtı. Bundan soñ faalni tutıp esir ettiler. Bir qaç künden soñ ise, onınıñ cesedi tapıldı. Onıñ qatiyi ale daa tapılmadı. Martnıñ 15-de ise onıñ cesedi bir çoq qıynav izleri ile Qarasuvbazar rayonı Ortalan köyüniñ civarında tapılğan edi. Faalniñ cenazesi 2014 senesi mart 18 künü Aqmescitniñ «Abdal» mezarlığında qılındı.

Qırım akimiyeti qırımtatar faaliyetçiniñ qatilini tapqanını mukâfatnen taqdirlemege söz bergen edi. Lâkin qatil alâ daa bulunmağan.

Mart 16 künü Kiyevde yerli faaliyetçiler Sofiya meydanında sessiz fleşmobnı keçirdiler.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG