«Boing - 737» Rostov-na-Donu avalimanında enişini kerçekleşken vaqıtta, uçaq qazasına oğradı. Onıñ neticesinde 62 insan elâk oldı. Uçaq Dubaiden sefer yapmaqta edi.
«FlyDubai» şirketi Feysbuk saifesinde bergen malümatlarğa köre, uçaqta 55 yolcu, olarnıñ arasında 33 qadın, 18 erkek ve 4 bala, ve ekipajnıñ 7 azası bar edi.
«FlyDubai» niñ qaydlarına köre, cedvelde çetel adamlarnıñ arasında Ukrainanıñ sekiz vatandaşı bar edi.
İlk haberlerge binaen, «FlyDubai» şirketiniñ uçağı, erte saarde elverişsiz ava şaraitlerinde enişini yapa edi. Yerge urulğan soñ, tutaşıp yanmağa başladı.
Avalimanınıñ tehnikiy hızmetlerinde aytqanları kibi, eniş vaqıtına pek küçlü ruzgâr esmekte edi.
«FlyDubai» şirketiniñ malümatına köre, Dubayden uçaq Grinviç vaqtına köre, saat 18:20 çıqtı, Rostov - na - Donu şeheriniñ avalimanına, Grinviçke köre, saat 22:40 uçıp kelecek edi. Qaza yüz bergeninden evel, ekipaj enmek içün üç kere areket etti, facia Grinviçke köre saat 1:42 olğan.
