Herson vilâyetiniñ şeher memuriyeti haber etkenine köre, «Vinkraft Ukraina» adlı müessise Novotroitskiy rayonında eki tane ruzgâr elektrik stantsiyalarını qurmaq niyetinde.
«Vinkraft Ukraina» şirketiniñ baş müdiri Karl Sturenniñ sözlerine binaen, müessise eki RES-niñ quruluşını Novotroitskoye ve Överânovka köyleri civarında planlaştırdı. Olarnıñ umumiy küçü 140 MVt olacaq. Leyhanıñ büceti 250 000 000 yevronı teşkil etmekte. Onıñ ömürge keçirilüvi bu senege belgengen», - dep aytıla matbuat hızmetiniñ mesacında.
Leyhanı teşkil etmek içün, Herson vilâyetiniñ başqa şirketleri de celp etilecek. Misal olaraq, «Herson gemiqurucılıq zavodı», vetrâklar içün mahsus qullelerini imal etecek. Vilâyet memuriyetinde qayd etkenleri kibi, mezkür qullelerniñ leyhası üzerinde çalışmalar endi alıp barılmaqta.
Şimdiki vaqıtta, vilâyette dört tane ruzgâr elektrik stantsiyaları ve eki tane küneş elektrik stantsiyası çalışmaqta. Olar episi 43,856 MVt meydanğa ketirmekte.
Herson vilâyeti territoriyasında «Kahovskaya - Titan» adlı 220 kV VL yerleşken. Şu stantsiyadan elektrik energiyası Kalançak, Çaplinka rayonları ve işğal etilgen Qırımğa tarqatıla edi. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin añlaşma bitkeni içün yarımadağa berilmey.
Herson vilâyetinde tamir işleri alıp barılğanı vaqıtta Kalançak ve Çaplinka rayonlarında elektrik devamlı kesile edi.
