Link açıqlığı

Ukraina vatandaşları Rusiyenen işğal etilgen Qırımnı terk etmege devam etmekte. Berilgen malümatlarğa köre, Ukrainanıñ çeşit rayonlarına endi 20 biñden insan köçip ketti. Bu aqta Yuqarı Şurasınıñ devletiçi yerini deñişken şahıslarnıñ uquqları saqlanuvı boyunca vekili Janna Lukyanenko bildirdi.

«Bizim qaydlarımızğa köre, şimdiki vaqıtta Ukrainada yarımadadan köçip kelgen 21 974 insan yaşamaqta. Afsus ki, bu aqın toqtağanı aqqında aytıp olamaymız. Keçken seneniñ noyabr ayından bu künge qadar biz, territoriya boyunca areket etken 628 adamnı qayd ettik. Öz nevbetinde, böyle vaziyet işğal etilgen yerde yaşamaq olmağanını tasdıqlay»,- dep qayd etti o, mart 17 künü, Kiyevde keçirilgen konferentsiya devamında.

Uquq qoruyıcıları, yarımadada adamlarğa qarşı yapılğan repressiyalar boyunca üç telüke gruppasını ayırdı, bular: Qırımnıñ işğalini qabul etmegenler, qırımtatarlar ve cemaat faalleridir.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG