Link açıqlığı

Ukraina prezidentiniñ qırımtatar halqı işleri boyunca elçisi Mustafa Cemilev, OON - da Avropa Birliginiñ delegatsiyası ile körüşti.

Bu aqta Cemilevniñ matbuat hızmeti bildirmekte.

«Ukraina prezidentiniñ qırımtatar halqınıñ işleri boyunca elçisi Mustafa Cemilev, Birleşken Milletlerde onı temsil etken Avropa Birliginiñ delegatsiyasınen körüşti. Belli ki, cuma künü, Rusiye tarafından yapılğan Qırım işğaliniñ 2 yıllığı munasebetinen, OON Telükesizlik Şurasınıñ Arria formatında keçecek oturışı planlaştırıldı», - dep aytıla mesacda.

Körüşüvde Meclis yolbaşçısınıñ muavini Aslan Ömer Qırımlı ve Amerika Qoşma Ştatlarındaki Meclis vekili Ayla Bakallı iştirak ettiler. Körüşüvniñ tafsilâtı berilmegen.

Cuma künü, Cemilev, OON toplaşuvında Rusiye tarafından işğal etilgen Qırımda insanlarnıñ aq-uquqları bozuluvı aqqında aytıp, Rusiyege qarşı sanktsiyalarnıñ quvetleştirüvini talap etecek. Bunıñnen bir sırada, o, Rusiye ordusına qırımlılarnıñ mobilizatsiyası boyunca söz yürütmek niyetinde.

2014 senesi mart 16 künü, Qırımda ve Aqyar şeherinde dünyanen tanılmağan referendum keçirildi. Onıñ neticesinde Rusiye Qırımnı öz terkibine kirsetti. Ne Ukraina, ne Avropa Şurası, ne de Amerika Qoşma Ştatları mezkür saylavnı qabul etti.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG