Link açıqlığı

Ukrain medeniy eviniñ faali Veldar Şukurciyevniñ bildirgenine köre, yarımadada tillerniñ musaviyligi yoqtır, qırımtatar ve ukrain tilleri ise tek bina levhalarında qullanılmaqta. Bu aqta, Şukurciyev Qırım.Aqiqat radiosınıñ efirinde bildirdi.

«İstimalde, maarif işlerinde bu tiller sanki yoq, tek kâğıtlarda formal olaraq keçmekteler... Mektepler, ukrain tilinde dersleriniñ keçirilmesi kerek olmağanı aqqında vesiqalarnı almaqtalar. Sanki adamalar tek rus tilinde ders berilmesini isteyler. Aynı mesele qırımtatar tili ile üküm sürmekte. Teñ uquqlıq oyunına beñzegen vaziyet. Er yerde tek rus tiliniñ qullanmasını, bunıñnen bir sırada ukrain ve qırımtatar tilleriniñ istimalden çıqarılmasını köremiz. Bu tiller tek bir yerde qullanıla, o da, binalarnıñ levhalarıdır», - dep ayttı Veldar Şukurciyev.

2014 senesi Rusiye tarafından işğal etilgen Qırımda, Cumhuriyet qanunınıñ 10 maddesine köre, yarımadada üç devlet tilleri ilân etildi. Faqat ukrain ve qırımtatar tilleri inkişaf etilmey, bunıñ yerine mekteplerde mezkür tillerıniñ saatleri qısqartıla.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG