Link açıqlığı

Ahtem Seytablayev: Reşat Ametov Qırım mustaqilligi içün canını feda etken ilk askeridir


Qırımtatar rejissörı ve aktörı Ahtem Seytablayev, Qırımda elâk olğan Reşat Ametovnı «Qırım ve Ukraina mustaqilligi içün ölgen ilk askeri» olaraq körgen. Bu aqta, Qırım.Aqiqat agentligine Seytablayev, mart 16 künü Kiyev şeeriniñ Sofiya Meydanında Reşat Ametovnıñ añına keçirilgen sessiz fleşmobı devamında bildirdi.

«O, Qırım ve Ukraina mustaqilligi içün canını feda etken ilk askeridir. O, şahıs, adam, üç balasınıñ babası. Menim içün, bugün mında bulunmaq şereftir», - dep ayttı Seytablayev.

Mart 16 künü, qırımtatar rejissörı başqa faallernen birlikte, Reşat Ametovnı ürmetnen añmaq maqsadı ile Kiyev merkezinde ötkerilgen sessiz fleşmobğa teşrif buyurğan.

«Men ukrain halqına minetdarlığımnı bildirmek isteyim. Qırım meselesi informatsion ceryanından yoq olmaması içün, ukrain cemaatçılığı pek çoq areket yapmaqta. Men eminim, eger epimiz, birinci nevbette qırımtatarlar, yarımadanı qurtarmaq kerekligi aqqında unutmasaq, halqara cemaatçılıq ta buñı unutmaz», - dep ayttı Seytablayev.

2014 senesiniñ mart 3 künü, Reşat Ametovnı tutıp esir ettiler. Mart 15 - nde Ametovnıñ cesedi bir çoq qıynav izleri ile Qırımnıñ Qarasuvbazar rayonınıñ dağında tapıldı.

Moskva nezareti astında bulunğan Qırım akimiyeti, qırımtatar faaliniñ öldürüvinen bağlı işiniñ açılması içün mukâfat vade etken edi. Amma faalniñ qatiyi bu künge qadar tapılmadı.

Kiyevde mart 16 künü Reşat Ametovnıñ añına sessiz fleşmob ötkerildi.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG