Moskva nezareti astında bulunğan Qırım prokuraturasınıñ talabı ile, endiden arabalarnıñ ukrain nomeralarını rus türlerine deñiştirüv protseduralarını tezleştirmek içün, Aqmescit MREOsı 24 saat çalışacaq.
Matbuat hızmeti bildirgeni kibi, böyle qarar mezkür mesele boyunca mart 16 künü keçirilgen toplaşuvından soñ alındı.
«Bugünden başlap, Qırım Cumhuriyeti boyunca çalışqan İç İşler Nazirliginiñ GİBDD MREOsı, arabalarnıñ teşkerüvini ve vesiqalarnıñ deñiştirmesini üzlüksiz şekilde kerçekleştirecek. Bunıñnen bir sırada, gece saatleri çalışmaq içün, hızmetçilerniñ cedveli deñişecek», - dep aytıla mesacda.
Prokuraturada qayd etkenleri kibi, hızmetniñ 24 saat çalışması, vesiqalarnıñ tez sürette yañartuvında yardım eter, böyleliknen GİBDD ögünde turğan arabalarnıñ üyürı da toqtatılır.
Rusiye nezareti astında bulunğan Qırım prokuraturasınıñ başı Natalya Poklonskaya bildirgenine köre, aprel 1 qadar arabalarnıñ ukrain türü nomeralarını rusiye türlerine deñiştirip yetiştirmegen aydavcılar, daa 3 ay devamında memuriy mesülietke çekilmeycek.
Rusiye İç İşler Nazirligi, akimiyet qararına bazı deñişmeler kirsetti. Olarğa köre, qırımlı aydavcılar aprel 1 kününe qadar elde etken arabalarnıñ ukrain türlerini rusiye türlerine deñiştirmek kerek.
Ukraina Nazirler Şurasınıñ iş gruppası, aprel 1- nden soñ esasiy Ukraina boyunca rusiye türleri olğan qırım arabalarınıñ areket etüvinen bağlı meselesini çezmekteler.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
