Rusiye nezareti astında bulunğan Qırım prokuraturasınıñ başı Natalya Poklonskaya bildirgenine köre, aprel 1 qadar arabalarnıñ ukrain türü nomeralarını rusiye türlerine deñiştirip yetiştirmegen aydavcılar, daa 3 ay devamında memuriy mesülietke çekilmeycek. Bu aqta TASS haber etti.
Poklonskaya «Pervıy kanal» - ınıñ efirinde qayd etkeni kibi, ilk evelâ tenbiyelev tedbirleri keçirilecek.
«Konkret programma ve konkret teklif bar, olarğa köre, eger insan registratsiya boyunca bütün meselelerini çezip yetiştirmese, nevbetteki daa üç ay devamında o, memuriy ve real mesülietke çekilmeycek», - dep ayttı Poklonskaya.
Rusiye İç İşler Nazirligi, akimiyet qararına bazı deñişmeler kirsetti. Olarğa köre, qırımlı aydavcılar aprel 1 kününe qadar elde etken arabalarnıñ ukrain türlerini rusiye türlerine deñiştirmek kerek.
Ukraina Nazirler Şurasınıñ iş gruppası, aprel 1- nden soñ esasiy Ukraina boyunca rusiye türleri olğan qırım arabalarınıñ areket etüvinen bağlı meselesini çezmekte.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
