Mart 17 künü Qırımnıñ Aqşeyh rayonında, dört köyde elektrikni tolusınen kesecekler, daa eki köy qısmen yarıqsız qalacaq. Bu aqta Rusiye nezareti astında bulunğan Qırım akimiyetiniñ saytında bildirilmekte.
«Saba saat 9:00 - dan 16:00 - ğa qadar Aqşeyh rayonında plan boyunca keçirilecek tamir işleri sebebinden, Bozuq quyu, Ağay, Borağan, Qocalaq köyleri, Oğuz Oğlu köyüniñ Sadovaya soqağı ve Aqşeyh qasabasınıñ Şkolnıy tar soqağı elektirksiz qalacaq», - dep aytıla mesacda.
Matbuat hızmeti añlatqanına köre, bu rayonda tamir işleri alıp barılmaqta.
Şimdiki vaqıtta, Rusiye tarafından işğal etilgen Qırım, kendi generatsiya, Rusiyeden generator tertibatı ve Kubandan keçirilgen energo köpüriniñ yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.
Qırımda 2015 senesiniñ noyabr 22 kününden başlap Ukrainadan elektrik berilmesiniñ toqtatılması sebebinden Fevqulade Vaziyet kirsetilgen. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
