Link açıqlığı

Evel Rusiyege qarşı tizilgen sanktsiyalarğa qoşulmağan Türkiye, soñki vaqıt Rusiye Federatsiyası ile munasebetleri müşkülleşkeni sebebinden, de - fakto Rusiyege ve onıñ tarafından işğal etilgen Qırımğa qarşı sanktsiyalarına qol tutıp başladı. Bu aqta, qırımtatar halqınıñ lideri Mustafa Cemilev, Azatlıq radiosına intervyü devamıda bildirdi.

Onıñ sözlerine binaen, evel Türkiye haber etkeni kibi, eger o, sanktsiyalarğa qol tutmasa, Türkiye ve Rusiye Federatsiyası arasında olğan ayırı bir munasebetleri sebebinden, Türkiye liderleriniñ sözleri qırımtatarlarnıñ uquqları qorumasında daa da «emiyetli» olur, - dep tüşüngenler.

«Biz bunıñnen razı degil edik, olarğa: siz işğal etilgen yerde bizim aqlarımıznı qorçalap olamazsıñız, tamır halqnıñ uquqlarını qorçalamasında tek bir yol bar, bu da yarımadanı işğalden qurtarmaqtır, - dep ayttıq», - qayd etti Cemilev.

Amma onıñ sözlerine binaen, Rusiye ve Türkiye arasında munasebetler bozulğan soñ, sanktsiyalar deyerlik Rusiye Federatsiyasınıñ teşebbüsinen teşkil olundı, Türkiye ise de-fakto bu sanktsiyalarğa qoşulğan.

«Qırımtatarlarnıñ mahsulat, soñra energetik blokadaları başta pek semereli degil edi. Bu al çeşit memleketlerden gemilernen ketirilgen aşait mallarınen bağlı edi...Bu cedvelde em yunan, em italyan, em rum malları olğan. Türkler bu areketlerni kontrabanda olaraq tanıy edi, çeşit bayraqlar altında kire ediler. Şimdi böyle areketler yapılmay. Yani Türkiye de Qırım blokadısında iştirak etkeni aqqında aytmaq mümkün», - dep ayttı Cemilev.

Onıñ qoşma malümatlarına köre, şimdiki vaqıtta Türkiye Ukraina ile iqtisadiy, siyasiy ve arbiy saalarda munasebetlerini pekitmekte.

Petro Poroşenko, mart 9-10 künleri Turkiyede iş ziyareti ile bulunıp, memleket akimiyetinen körüşüvlerni keçirdi. Çarşenbe künü Poroşenko ve Turkiye prezidenti Recep Tayip Erdoğan, eki devletniñ strategik işbirligi aqqında umumiy deklaratsiyasını imzaladılar.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG