Reşat Ametovnıñ tul qadını, ömür arqadaşınıñ esir etken adamları tañılğanına baqmadan öldürüvini taqiq etmegenleri aqqında bildirmekte.
Bu aqta o, Qırım.Aqiqat radiosınıñ yayınında haber etti.
Onıñ malümatlarına köre, Qırımda cinaiy iş ğayrıdan taqiq etile, amma yañı neticeler yoq.
«Menimce, olar (Qırım uquq qoruyıcıları) köz boyamaq içün areketler yaptı. Kerçekte, elbette ki, bir şey yoq. Olar er şeyni red eteler. Biz olarğa: araba nomerası, adamlar, betler körüne. Olar da: yoq, - dep aytalar. Cinaiy iş ğayrıdan baqılıp başladı, amma şimdi iç bir şey belli degil», - dep ayttı Zarina Ametova.
Programmanıñ başqa musafiri - Qırım Cumhuriyetiniñ Ukraina Baş Prokuraturasınıñ prokurorı muavini Petro Kovalenko bildirgeni kibi, Reşat Ametovnıñ öldürüvi esasiy Ukrainada da taqiq etilmekte. O, bu işte rast kelgen qıyınlıqlar aqqında tarif etti.
«Rusiye tarafından işğal etilgen yarımadada birinci nevbetteki ve başqa taqiq areketlerini yapmağa qıyın ola. Bu sebepten ne maddiy delillerge, ne de cinayet yapılğan yerini baqmağa irişim yoqtır», - dep ayttı o.
2014 senesiniñ mart 3 künü, Reşat Ametovnı tutıp esir ettiler. Mart 15 - nde Ametovnıñ cesedi bir çoq qıynav izleri ile Qırımnıñ Qarasuvbazar rayonınıñ dağında tapıldı.
Moskva nezareti astında bulunğan Qırım akimiyeti, qırımtatar faaliniñ öldürüvinen bağlı işiniñ açılması içün mukâfat vade etken edi. Amma faalniñ qatiyi bu künge qadar tapılmadı.
Kiyevde mart 16 künü Reşat Ametovnıñ añına sessiz fleşmob ötkerilecek.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
