Link açıqlığı

Qırımdan köçip kelgen, Yevromaydannıñ faali Gayde Rizayeva, Şefiqa Gasprinskaya adına qadınlar batalyonını teşkil etmek fikiri ile çıqışta bulundı.

Rizayeva Qırım.Aqiqat agentligine bildirgeni kibi, şekillenüvniñ esas vazifesi ATO zonasında, çeşit batalyonlarda cenkleşken qırımlılarğa yardım köstermektir. İleride ise Qırım qaytarılmasınıñ tedbirlerinde iştirak etmektir.

«Bu batalyonda qırımtatarlar ve Qırımnıñ meselesine pervasız qalmağan adamlar toplaşa. Bütün faktlarnı açıqlamağa istemez edim, amma batalyonımıznıñ bazı iştirakçileri yarımadada yaşap, kerekli işlerni anda alıp baracaqlar. İlk evelâ, bizim vazifemiz Qırımnıñ qurtarılmasında iştirak etmektir. Amma şimdiki vaqıtta böyle imkân olmağanı içün, Ukrainada cenkleşken vetandaşlarımızğa elimizden kelgeni qadar yardım etecekmiz», - dep ayttı Rizayeva.

Onıñ qayd etkenine köre, şimdiki vaqıtta iştirakçilerniñ cedveli tizilmekte, soñra ise onıñ teşkil olunmasınen bağlı vesiqalar Ukraina mudafaa nazirligine teslim etilecek. Rizayeva bildirgeni kibi, batalyonğa aşçı, psihologlar, arbiy olacaq qadınlar kirecek.

«Tek tünevin bizge bir sıra muracaat keldi. Amma episini qabul etmeycekmiz. Er biriniñ Ukrainağa sadıqlığı ve vatanperverlik duyğularında emin olmaq kerekmiz. Aramızğa «mahsus yollanılğan adamlar» olacağını köz ögüne alıp, ciddiy saylav keçirecekmiz» - dep bildirdi Rizayeva.

Ukraina mudafaa nazirliginde qadın - qızlarnıñ batalyonı teşkil etilmesinen bağlı malümatnı izaatlamadılar.

Gayde Rizayeva - Yevromaydannıñ faali ve volonter, antiterroristik operatsiyaları keçirilgen yerlerde eki kere esirge tüşken.

Şefika Gasprinskaya - belli qırımtatar mütefikkiri İsmail Gasprinskiyniñ qızı. O, Azerbaycan demokratik Cumhuriyetiniñ esasçılarından biri Nasib - Bek Usubbekovnıñ ömür arqadaşı. Qırımda yigirminci asırlarınıñ başında çalışqan «Qırım müslüman qadınlar icra komiteti» qırımtatar areketiniñ lideri. Onıñ adı ile, o vaqıtnıñ islâm dini içün unikal olğan müslüman qadın - qızlar areketi bağlıdır.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG