Rusiye tarafından Qırım işğaliniñ yıllığı çerçivesinde Keriç şeherinde bördürlerni yuvıp, qoralarnı boyalaylar.
Qırım.Aqiqat agentliginiñ bildirgenine köre, mart 15 künü kommunal hızmetçileri Admiralteyskiy keçiti boyunca, yalı kenarınıñ rayonında bördürlerni boyalamaq içün azırladı. Portaqal tüste jiletlerdeki adamlar yağmur ve sılaq qar tübünde bördürlerni yuvğanlar.
Kommunal hızmetleri şeher merkezindeki bördürlerni yañılatıp, olarnı Keriç şeheri içün tabiy olğan qırmızı tüske boyaladılar. Umumen alğanda, olarnı uzun zaman kimse yañılatmağan edi.
Bunıñnen bir sırada, Deñiz balıq portı rayonında qoralar boyalandı.
Şeher memuriyeti yerli iş adamlardan binalar ögündeki bayraqlarnınıñ yañılatmasını talap etti.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
