Mart 15 künü Kefe şeheriniñ Otuz köyünde yaşağan yerli imam torunı Arsen Abduraşitovnıñ evine Rusiye nezareti astında bulunğan Qırım arbiy hızmetleriniñ vekilleri keldi. Beşten ziyade adam, olarnıñ arasında silâlı da olğan, evniñ tintüvini keçirdiler.
Bu aqta Qırım.Aqiqat agentligine Qırımdaki insanlarnıñ uquq qoruma gruppasınıñ reisi Abdureşit Cepparov bildirdi.
«Evge silovikler keldi, beşini eminliknen körgenler, qalğanları azbarnıñ çetinde bekledi. Olarda olğanı kibi, beşten üçü - avtomatçikler, ekisi ise grajdanlıq urbasında, sanki dersiñ Kefe politsiyasınıñ vekilleri. Arsenniñ aytqanına köre, olar azbardki bir qaç qurulışını baqtılar. Amma tintüv temelsiz keçirildi, politsiya vekilleri iç bir vesiqa ya da qararnı köstermedi. Köz atıp baqtılar, aktnı imzalap kettiler. Buña tintüv de demezsiñ», - dep ayttı Cepparov.
Bunıñnen bir sırada, Cepparovnıñ qayd etkenine köre, uquq qoruyıcılar belgilegeni kibi, soñki vaqıt evleri tintüvge oğrağan adamlar bu faktqa diqqatnı celp etmege istemeyler.
«Bizim qaydlarımızğa köre, tintüvge oğrağanlar bu vaqialarnı tüşürip qaldırmağa tırışalar. Bizim fikirimizce, Müftiyatqa yaqın olğan adamlar bu aqta şamata kötermege istemeyler. Kimge ve nasıl alâmetke köre evlerge kelgenlerini şimdi aytıp olamaymız», - dep qoştı Qırım uquq qoruyıcı gruppasınıñ koordinatorı.
Fevral 11 künü, Qırımda, qırımtatarlarnıñ evlerinde bir sıra tintüvler keçirildi. Olarnıñ neticesinde 12 insan tutıp qapatıldı, sorğudan soñ çoqusı azat etildi. Rusiye nezaret astında bulunğan Qırım prokurorı Natalya Poklonskaya «Hizb ut - Tahrir» adlı terroristik teşkilâtınıñ faaliyetinen bağlı cinayi işniñ açılması aqqında bildirdi.
Fevral 12 künü qapatılğan dört insan, Müslim Aliyevniñ, Emir - Üsein Kuku, Enver Bekirov, ve Vadim Siruknıñ apiste yatma müddetini aprel 8 kününe qadar uzattılar.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
